Korab Sejdiu (Deputet). Foto: Atdhe Mulla

Korab Sejdiu Jep Dorëheqje nga AKR-ja

Deputeti i Aleancës Kosova e Re (AKR), Korab Sejdiu, pasi që subjekti i tij i është bashkuar koalicionit PAN, ka dhënë dorëheqje nga AKR-ja dhe nga të gjitha pozitat në strukturë të këtij subjekti.

NDËRLIDHUR

Sejdiu ka thënë se arsyeja kryesore për këtë vendim është qeveria e pakicës shqiptare, e varur nga Lista Serbe.

Korab Sejdiu përmes një postimi në “Facebook”, ka thënë se tani për tani veprimtarinë e tij politike do ta vazhdojë si deputet i pavarur në Kuvendin e Kosovës.

“Sot shkruaj për t’ju dhënë dy njoftime. 1. Une e kuptoj se politika është arti i së mundurës, dhe se të qenurit në politikë kërkon nganjëherë edhe bërjen e kompromiseve të dhimbshme. Mirëpo, unë ndaj mendimin e atyre që kur bëhet fjalë për interesat e shtetit, nuk na lejohet të bërit kompromis. Unë në vazhdimësi kam qenë konsistent me qëndrimin që një qeveri me pakicë shqiptare dhe e kushtëzuar nga lista serbe është në kundërshtim me interesat e shtetit sepse mbetet peng i regjimit të Beogradit. Rrjedhimisht edhe kam potencuar se nuk mund ta mbështes një gjë të tillë. Për më tepër, kam bërë tentativa të sinqerta me shumicën shqiptare (LAA dhe VV) që të formojmë alternativën qeverisëse që ka legjitimitet nga populli. Jam tepër i zhgënjyer që interesat e ngushta partiake pamundësuan realizimin e këtij qëllimi, përkundër momentit jetik për të larguar të keqen nga ky vend”, ka thënë ai.

Sejdiu deklaroi se do të votojë kundër në të dyja instancat, edhe zgjedhjen e Kryeparlamentarit por edhe të Qeverisë.

“2. Unë mendoj se ne si përfaqësues të popullit, kemi pasë një mundësi të rrallë kësaj rradhe që t’i jepim Kosovës kthesën drejt të mirës. Fatkeqësisht, për arsye të pakuptimta për mua, ky qëllim nuk u realizua. Në anën tjetër, është më se e qartë se unë dhe Aleanca Kosova e Re (“AKR”) kemi mendime të ndara sa i përket asaj se çka mendojmë është në të mirë të vendit, dhe në këtë është evidente që qëndroj i vetëm në këtë subjekt. Unë nuk kam dëshirën e as vullnetin që të shkeli mbi nderin dhe fjalën time. Por njëkohësisht, nuk kam të drejtë morale që të votoj kundër një Qeverie ku pjesë përmbajtësore është Presidenti Pacolli dhe AKR, përderisa unë jam pjesë e AKR”, ka shkruar ai.

Sejdiu ka njoftuar se ka deponuar tek kreu i AKR-së Behgjet Pacolli dorëheqjen e tij nga ky subjekt dhe nga të gjitha pozitat në strukturë të këtij subjekti siç thotë aime efekt të menjëhershëm, shkruan rtv21.tv.

“Unë kam falenderuar Presidentin Pacolli për bashkëpunimin e deritashëm dhe vullnetin e tij të sinqertë që të jem edhe pjesë përbërëse e rrugëtimit të AKR-së në qeverinë e ardhshme. Lus që dorëheqja ime të merret thjeshtë si veprim moral që t’i qëndroj besnik fjalës sime në këtë moment vendimtar për vendin. Veprimtarinë time politike tani për tani do ta vazhdoj si Deputet i pavarur në Kuvendin e Republikës së Kosovës. Kjo është e tëra që dëshiroj të theksoj në këtë kohë lidhur me këtë çështje. Ju falenderoj për mirëkuptim dhe përkrahjen e vazhdueshme”, ka përfunduar ai./21Media

07 Shtator 2017 - 08:40

RTV 21 07/09/2017 - 08:40
NDËRVEPRIMI0