Komuna e Pejës më Pak Buxhet për Bujqësi

Komuna e Pejës sipas kornizës afatmesme buxhetore do të ketë më pak para për bujqësinë në vitet në vijim.

Gjatë debatit në asamble për kornizën afatmesme buxhetore të Komunës së Pejës, këshilltarët komunalë nga opozita kritikuan ekzekutivin për zvogëlimin e mjeteve buxhetore të sektorit të  bujqësisë.

NDËRLIDHUR

Këshilltari komunal nga radhët e Aleancës për Ardhmërinë e Kosovës, Blerim Nikçi, tha se korniza afatmesme buxhetore nuk garanton mirëqenie.

“Bujqësia pylltaria dhe zhvillimi rural, realisht është paraparë tkurrje ose zvogëlim i mjeteve. Nga 1.2 milion në vitin 2016, 900 mijë në 2017,vazhdon tkurrja ose zvogëlimi në 550 mijë për vitin 2018. Zhvillimi ekonomik(drejtoria) po ashtu në zvogëlim”, tha asamblisti i AAK-së.

Edhe Avdi Shkreli asamblist i LVV-së tha se me zvogëlimin e mjeteve nuk ka zhvillim të bujqësisë.

“Me këtë zvogëlim prej 550 mijë e 960 eurove nuk konsiderojmë se bujqësia mundet me u përparu, apo mu ndryshu gjendja e saj. Dihet mirëfilli se në këtë sektor po të jenë trefish këto mjete të planifikuara në këtë kornizë, përsëri nuk do jenë të bollshme”, tha ai.

Kandidati i pavarur, Arzen Bytyqi tha se kujdes me të madh duhet pasur në fazën e dytë të kornizës buxhetore.

“Kujdesin ma të madh ish dashtë me pasë te specifikimi i projekteve, do të thotë për fazën e dytë, s’po flas për këtë fazë. Edhe tek dinamika e kryerjes së punëve të projekteve”, tha Bytyçi.

Kurse, drejtori i Financave në Komunën e Pejës, Jeton Abazaj, tha se në shumicën e debateve publike të organizuara rreth ndarjes buxhetore shumica e asamblistëve nuk marrin pjesë.

Abazaj deklaroi se buxheti komunal i Pejës nga 22 milionë është rritur në 24 milionë euro.

“Pjesa tjetër është e fokusuar në investimet kapitale edhe si shkak i kësaj vjen që investimet vitin e ardhshëm të shkojnë 6.4 milionë që është një trend pozitiv”, tha ai.

01 Korrik 2017 - 19:30

Shkodran Nikçi 01/07/2017 - 19:30
NDËRVEPRIMI0