Foto-ilustrim | sxc
KGJK: Zvogëlohet Numri i Lëndëve për 10 Për Qind
Këshilli Gjyqësor i Kosovës e ka vlerësuar të suksesshëm vitin 2016 për zvogëlim të numrit të lëndëve të gjykatave.
Sipas një komunikate të këtij institucioni numri i lëndëve që kanë mbetur të pazgjidhura është më vogli që nga riorganizimi i gjykatave në vitin 2013.
“Numri i tërësishëm i lëndëve është zvogëluar nga 440.627, që ishte në fillim të vitit 2016, në 399.031 në fund të vitit, e që është numri më i ulët që nga riorganizimi i gjykatave në fillim të vitit 2013”, thuhet në kominikatë.
Sipas KGJK-së, gjykatat në fillim të vitit 2016 kanë pasur 440.627 lëndë në punë, ndërsa gjatë 2016-ës kanë pranuar edhe 438.412 lëndë.
KGJK-ja njofton se vitin e kaluar u zgjidhën 479.937 lëndë “që janë 41.535 më shumë sesa numri i lëndëve të pranuara”.
Këshilli Gjyqësor tregon se më së shumti u zvogëluan lëndët e kundërvajtjeve.
“Përfitimet më të mëdha janë arritur përmes zvogëlimit të numrit të lëndëve të kundërvajtjeve, nga 210.983 lëndë në fillim të vitit, në 189.734 lëndë në fund të vitit, që do të thotë, zvogëlon numrin prej 21.249 lëndësh”, thuhet në komunikatë.
Edhe lëndët përmbaruese u zvogëluan sipas KGJK-së.
“Përmbarime nga 95.479 lëndë në fillim të vitit, në 74.505 lëndë në fund të vitit, një zvogëlim prej 20.974 lëndësh”, sqaron komunikata.
Zvogëlim pësuan edhe lëndët e krimeve të rënda.
“Përfitime të rëndësishme janë realizuar edhe në krimet e rënda ku numri i lëndëve është zvogëluar nga 5.593 lëndë në fillim të vitit, në 4.840 në fund të vitit, që paraqet shkallë pastrimit prej 132.5%”, sqaron KGJK-ja.
Sipas komunikatës, edhe pse i vlerësoi rezultatet e arritura, kreu i KGJK-së Nehat idrizi kërkoi edhe më shumë punë.
“Por, edhe pse ne jemi të kënaqur me përmirësimet në vitin 2016, mbetet akoma punë për t’u bërë, sistemi gjyqësor ka nevojë të vazhdojë përmirësimin e efikasitetit, ashtu që lëndët të procedohen më shpejtë dhe njëkohësisht të ruhet edhe cilësia”, tha Idrizi.
Ai konstatoi se është rritur ngarkesa me lëndë e Gjykatës së Apelit.
“Ngarkesa me lëndë në Gjykatën e Apelit ka vijuar të rritet dhe ne po punojmë me kryetarin e gjykatës dhe kolegët e tij që në vitin 2017 të ketë përmirësim të efikasitetit”, tha Idrizi.
Edhe ish-kryetari i Gjykatës Themelore në Prishtinë Hamdi Ibrahimi, në fund të vitit të kaluar kishte thënë se është zvogëluar numri i lëndëve të vjetra.
http://kallxo.com/rame-buja-para-gjyqit-per-keqperdorim-detyre/
Në vitin 2013 Gazeta Jeta në Kosovë shkroi për një strategji të gjyqësorit kosovar për zvogëlimin e lëndëve të vjetra.
Strategji E Re Për Lëndët e Vjetra