Radovan Karaxhiq - Foto: ICTY
Ish-Këshilltari i Radovan Karaxhiqit Gjykohet për Krime Kundër Njerëzimit
Jovan Tintor, i njohur gjithashtu si Joja, doli në gjyq të hënën në gjykatën shtetërore në Sarajevë i akuzuar për ndalim të paligjshëm, torturim, rrahje, punë të detyruar dhe vrasje të viktimave boshnjake dhe kroate në disa vende, përfshirë edhe kampet e burgimit.
Tintor, ish-drejtor i Komitetit të Krizës të komunës Vogosca, akuzohet për pjesëmarrje në një sulm të gjerë dhe sistematik kundër popullsisë jo-serbe në komunë nga prilli 1992 deri në fund të korrikut të atij viti.
Ndër të tjera, Tintor akuzohet se ka vrarë një grua që ishte në muajin e shtatë të shtatzënisë.
Prokuroria pretendon se, si pasojë e krimeve, pothuajse e gjithë popullsia boshnjake dhe kroate u dëbua nga zona e Vogoscas dhe rrethinat e saj në fund të vitit 1992.
I pandehuri e deklaroi veten të pafajshëm.
“Lavdi Zotit, s’kam pse ta mbroj veten nga të gjitha këto akuza. Nuk jam fajtor për asgjë,” tha Tintor në gjykatë.
Një nga avokatët e tij, Nina Kisiq, tha se mbrojtja nuk do ta mohonte se Tintor ishte kryetari i Komitetit të Krizës të komunës Vogosca nga fundi i prillit deri në maj të vitit 1992, por këmbënguli se puna u mor përsipër nga një person tjetër në fund të majit të atij viti.
“Ne do të vërtetojmë se sipërmarrja e përbashkët kriminale nuk ekzistonte. Tintor nuk ishte i përfshirë në ndonjë aktivitet kriminal,” tha Kisiq.
Ajo tha se akuzat se ka pasur një sulm i gjerë dhe sistematik kundër popullsisë lokale në Vogosca ishin të pavërteta.
Tintor ishte ish-këshilltari i presidentit serb të Bosnjës Radovan Karaxhiq dhe kryetari i Partisë së tij Demokratike Serbe në Vogosca.
Karaxhiq u dënua për gjenocid dhe krime të tjera nga gjykata e Hagës në mars të vitit të kaluar. Çështja tani ka kaluar në apel.
Gjyqi i Tintorit do të vazhdojë më 16 janar.