Haradinaj Uron Kancelaren Merkel për Fitoren
Kryeministri Ramush Haradinaj i ka dërguar një letër urimi kancelares gjermane, Angela Merkel, me rastin e fitores së saj në zgjedhjet e 24 shtatorit.
Sipas një komunikate të Qeverisë, në letër ndër tjera kryeministri Haradinaj i ka shprehur admirimin e tij për rizgjedhjen e saj në mandatin e katërt radhazi për t’u shërbyer interesave më të mira të Republikës Federale të Gjermanisë.
“Kryeministri kosovar e ka lavdëruar Kancelaren për lidership të qëndrueshëm dhe të fuqishëm, si dhe për rolin e rëndësishëm që ka ajo dhe Qeveria gjermane në mbështetjen e perspektivës politike dhe ekonomike të Kosovës”, thuhet në komunikatë.
Në këtë letër, Ramush Haradinaj ka rikonfirmuar përkushtimin e Qeverisë së Kosovës për thellimin e mëtejmë të bashkëpunimit dhe të marrëdhënieve të shkëlqyera ndërmjet dy vendeve.
