Ramush Haradinaj | Foto: Atdhe Mulla
Haradinaj: U Dakordova me LDK-në për të Ecur Përpara
Në një konferencë për gazetarë Kryeministri Ramush Haradinaj ka treguar se projektligjit për demarkacionin i është shtuar vetëm pjesa “si orientim”.
Haradinaj deklaroi se shtimi i këtyre dy fjalëve është bërë me kërkesë të LDK-së në nenin 3, pikën 1.2 të Projektligjit për ratifikimin e marrëveshjes së demarkacionit.
Në këtë nen e pikë flitet për dokumentacionin zyrtar të komisionit shtetëror për shënimin e kufirit.
Haradinaj këtë shtesë e cilësoi të panevojshme, por tregoi se është pajtuar me të.
“Mendoj se për bindjen time është e panevojshme kjo shtesë, nëse kjo është kërkesa e tyre për me përkrah ligjin kam ra dakord”, tha Haradinaj në konferencë.
Ai dakordimin e sotëm e cilësoi edhe njëherë “heqje të pengesës së fundit politike që të arrihet një konsensus me LDK-në në parlament”.
Kryeministri megjithatë nuk ishte i sigurt nëse dy të tretat e deputetëve do ta votojnë marrëveshjen e demarkacionit.
“Ta shohim tash vështirë me folë”, tha Haradinaj.
Ai deklaroi se nuk ka konsensus për votim të demarkacionit me Listën Serbe.
“Ende nuk kemi konsensus me Listën Serbe, dakordim nuk e di a do ta kemi apo kur”, tha Haradinaj.
Seanca për ratifikimin e marrëveshjes së demarkacionit është caktuar të mërkurën.