Haki Abazi: Aktakuzat e Speciales, Fundi i Koalicionit PDK- LDK

Haki Abazi, i ftuar në emisionin ‘Jeta në Kosovë’, foli për parashikimet e tij për të ardhmen e koalicionit qeveritar në mes të PDK-së dhe LDK-së.

“Unë mendoj që [koalicionin] do ta rrëzojë PDK-ja për shkak se ka me e matë mirë situatën që ka me u kriju për shkak të konfliktit të brendshëm brenda PDK-së dhe e dyta, efekti që do të krijojë arrestimi nga ana e Gjykatës Speciale. Një vakuum që mendoj se do të krijohet me automatizëm qoftë nga veprimi direkt i Gjykatës Speciale apo efektet anësore të saj do ta detyrojnë lidershipin e PDK-së që të bëjë manovrim për ta rikonsoliduar fuqinë e vet”, tha Abazi.

Abazi përballë Jeta Xharrës shprehu qëndrimet e tij rreth zhvillimeve të deritanishme dhe veprimeve që mund t’i ndërmarrë Gjykata Speciale në këtë vit.

Ai tha se Gjykata tashmë ka kryer të gjitha fazat e kornizës ligjore dhe nuk ka më arsye të ketë vonesa për veprime konkrete apo aktakuza.

“Do të jetë e vështirë për një institucion i cili e ka kry fazën e kornizës ligjore, miratimeve të duhura që të vazhdojë të mbajë peng një proces i cili realisht është dizajnuar për t’i adresuar çështjet të cilat po e mbajnë Kosovën peng sepse nuk mund të paragjykojmë vendimin e fundit të Gjykatës Speciale por si proces është duke e mbajtur peng”, tha Abazi.

Në këtë intervistë e cila do të transmetohet sonte në RTK në orën 20:15, Haki Abazi analizoi edhe zhvillime të tjera në vend gjatë vitit 2016 duke përfshirë ngjarjet në veri të Mitrovicës, korrupsionin, rezultatet e testit PISA…