Gjuajti me Armë për të Mbrojtur Drunjtë

I akuzuari për posedim të armëve, Hajdin Hajdini, nuk u paraqit në gjykatore lidhur me rastin e 21 shtatorit të vitit 2011.

Në bazë të aktakuzës, teksa i akuzuari gjendej në pronësi të tij në lokacionin Bërnicë e Epërme, kishte shtënë me armë në ajër pasi që kishte vërejtur tre persona duke prerë dru.

Sipas aktakuzës, qëllimi i të shtënave me armë i Hajdin Hajdinit më 21 shtator 2011 kishte qenë frikësimi i personave të cilët ishin duke prerë dru në pyllin e tij.

Pas kontrollimit të tij nga ana e policisë, Hajdinit i ishin gjetur edhe 4 fishekë pa lejen valide për mbajtjen e tyre. Këtyre fishekëve nuk u dihet as vendi i prodhimit.

Hajdini ngarkohet nga prokuroria për mbajtje në pronësi, kontroll, posedim ose shfrytëzim të paautorizuar të armëve.

Gjyqtarja Shadije Gërguri bëri të ditur se Hajdini e ka pranuar ftesën nga gjykata, por i njëjti nuk ka ardhur dhe nuk e ka arsyetuar mungesën.

Gërguri tregoi se do të lëshohet urdhëresa për sjelljen e tij në seancë.

Seanca është shtyrë për muajin prill.