UDHËTIMI FLAMUROR I ISA BOLETINIT
(Variant i ripunuar)
1.
Nëpër male shpejton Drini,
Rend dhe Isa Boletini.
Nëpër muzg e shqyen borën,
Në gacë të llullës shikon orën.
Këqyr kah jugu, herë kah Kosova:
“Haj medet, thotë, u vonova…!”
Përmbi vetull e çon dorën,
Dhe i ngjet se shikon Vlorën.
Sheh flamurin si valëvitet,
Ngutet Isa e nuk i pritet:
“Gjallë a vdekë, sot a nesër,
Do të jem në Vlorë patjetër…!”
Plaku i Vlorës i fanitet,
Diçka pret e nuk i pritet.
Dorën plaku e shkon në mjekër:
“Do t’ arrijë Isa patjetër…!”
Mërmërin dhe Drini i vjetër:
“Do t’arrijë Isa pa tjetër!
Herët a vonë, sot a nesër
Do t’arrijë Isa, pa tjetër…”
2.
Përmes fushe, shket Shkumbini :
“Këmbë të mbarë, Isë Boletini!”
Një lot gëzimi, për lule Vlorën,
Një lot dhembje, për Shalë Bajgorën.
Lotët rrjedhin mbi flamur,
Loti ngrin, bëhet gurë…
“-Isë Qemali, mirë se të gjeta!”
“-Isë Boletini, tungjatjeta!”
Një kré Shale e një kré Vlore,
Një Shqiponjë shqiptare, dykrenore…
Boletini sheh nga Kanina:
-“Ç’rrebesh breshëri, kah Janina…!”
Plaku i Vlorës sheh kah Ulqini,
Kah Korabi, Sharri, kah Boletini…
Sy e shpresë kah Evropa:
“-Nuk ka paqe, copa- copa…”
Plaku lyp “vatanet e tia”,
Isa është mirë, “kur është tok Shqipnia…”
Nga Evropa gjëmon “ghemia,” (Anija)
Turbull vjen, pas, historia…
Dita vjen, nata nuk shkon,
Nuk dihet ç’lind as ç’perëndon…
Përmes valësh, në stuhi e mjegull.
Dita vjet e nata shekull…
Në det me valë, një varkë rrëshqet:
“-U vonuam, Haj medet…!”
Oshëtin Korabi i vjetër:
“Do të vijë, Isa, patjetër…
Herët a vonë, sot a nesër,
Do t’ arrijë Isa patjetër…”
3.
Nëpër male dredhon Drini,
Ngjitet Isa, kah Boletini.
E udhëtimi nëpër natë të zezë
Është i gjatë, i pabesë…
Një urë e zezë me gurgullimë
Bubullimë e ulurimë:
-“Dorëzohu Isë, je në pusi…
Nuk ke shtek për në Veri…”
Një xixë stralli, një unur,
Një erë eshke, një gacë në llullë…:
-“Jam n’udhë time, or pritazi,
Nga Shqipnia shkoj në Shqipni…
Udhë e shenjtë, që s’ndalet kurrë,
Si ky ujë që rrjedh nën urë…”
Krisma e britma, terr e mjegull,
Zgjatet nata , bëhet shekull…
Matan bjeshke pret Dukagjini,
Do t’arrijë Isë Boletini…
4.
Me sy kah Deti, gjarpëron Drini,
Ngjitet Isa, kah Boletini…
Udhëtim i gjatë, i gurtë, i ngurtë,
I flakëruar, i flamurtë…
Nga dredhia në dredhi,
Nga pabesia në pabesi…
Agon dita e nata s’shkon
Dielli ndrin e nuk rrezon…
Një këmbë nga Dibra, një nga Gjakova
Haj medet thotë u vonova…
Plaku i Vlorës i fanitet,
E pret Isen e nuk pritet.
“Isë o Lis flamuror;
Në ballë të hapit shekullor,
Shtizë flamuri, arbëror,
Shkup e Shkodër, Shalë e Vlorë…”
Dorën Plaku e qon në mjekër:
“-Do të arrijë, Isa, patjetër.
Herët a vonë, sot a nesër
Do t’arrijë Isa patjetër…”
Mërmërin dhe Kulla e Vjetër :
-“Do t’arrijë Isa patjetër… “
5.
Në gërxhe e gryka gulçon Drini:
“S’ ndalet Isa Boletini…
Herët a vonë, sot a nesër,
Do t ‘arrijë Isa, patjetër…
Nga kjo rrjedhë a rrjedha tjetër,
Do t’arrijë në cak pa tjetër.”…
1984, “CZ”-2015, Pr.