Për “Bashkohun”, Marijuanën, Nobelin etj.

Kryetari i PLK-së, Gjergj Dedaj, në një intervistë për Gazetën Jeta në Kosovë, për çështje të liberales, jep përgigjje ndonjë herë të përputhshme e herë tjera krejt të ndryshme me çfarë do të thoshin liberalët në shumë shtete në perëndim, ose edhe në rajon. 

Për shembull, ai pajtohet për abortin, kushtet e barbarta që duhet të krijojë shoqëria për anëtarët e saj, thotë se në veprimtarinë e tij ka treguar “individualizëm të paparë” etj.

Por, Dedaj shpesh tregohet liberal ndaj mos-liberalizmit. Dedaj thotë se subjekti i ri politik Lëvizja “Bashkohu” bie në kundërshtim me aspiratat e Republikës së Kosovës, se Organizata e Konferencës Islamike është fundamentaliste dhe se martesat e të njëjtës gjini duhet të lejohen, por se gjeneratat e reja shoqëria duhet t’i edukojë “në frymën tradicionale”.

Në shumë shtete perëndimore, partitë liberale përkrahin integrimin dhe mbështesin pa drojë barazinë ndërmjet komuniteteve. Po të jetonte në Francë, Dedaj edhe do të votonte për Nicholas Sarkozy-në.

Politikani veteran përkrah uljen e taksave për investitorët e fuqishëm në Kosovë teksa kompanitë privatizuese turke i duken “të dyshimta dhe jodobiprurëse”. Mbështet edhe azilin për perëndimorët, por thotë se grupet fundamentaliste islamike në Kosovë duhet të jenë non-grata.
 
Pastaj, kreu i “liberales” është për burgim të përjetshëm të shpërndarësve të saj dhe jolegalizim të marijuanës.
 
Nëse kreu liberal serb Çedomir Jovanoviq përkrah pavarësinë e Kosovës, Dedajt pakicat në Kosovë i duket se janë tepër të favorizuara. Madje, në këtë aspekt, sipas tij, Kosova është si shtetet skandinave .

Ai insiston se Qeveria Thaçi duhet të fitojë çmimin Nobel.

Nuk mban kafshë në shtëpi sepse në Prishtinë, thotë ai, nuk ka spital për trajtimin e tyre dhe as ndonjë hotel për t’i lënë ato kur ai dhe familja do të mund të ishin në ndonjë vizitë.

“Bashkohu” është formuar nga individë jashtë interesave të Kosovës

Në KQZ është regjistruar së voni lëvizja “Bashkohu” si subjekt politik. A është problematike që në Parlament të ketë parti fetare?

Dedaj: PLK, si parti e vlerave euro-perëndimore dhe anëtare e familjes së Aleancës Liberale Demokratike të Europës, tash e afër 22 vjet promovon filozofinë e tolerancës, mirëbesimit dhe respektimit ndërfetar e ndëretnik. Kuptohet se Kushtetuta e Republikës së Kosovës e ka përcaktuar qartë Kosovën si një shtet laik dhe se nuk parapëlqejmë formimin e subjekteve politike fetare, nga fakti se feja duhet të jetë e ndarë nga politika dhe jeta institucionale. KQZ nuk duhet të regjistrojë asnjë parti politike e cila është në kundërshtim me Kushtetutën e Kosovës dhe e cila cenon tolerancën ndërfetare si vlerë historike në shoqërinë tonë.

PLK konsideron se Lëvizja Islamike “Bashkohu” është formuar nga individë jashtë interesave të Kosovës dhe për interesa të personave dhe klaneve të dyshimta

Kosova si pjesë gjeografike dhe politike e Europës duhet të mbetet një shtet laik, demokratik dhe i integruar në Bashkimin Europian, në OKB, NATO dhe në të gjitha mekanizmat e botës demokratike dhe institucionet Euroatlantike, por jo në ato institucione të karakterit fetar, fundamentalist dhe islamik siç është, ta zëmë, Organizata e Konferencës Islamike etj. PLK konsideron se Lëvizja Islamike “Bashkohu” është formuar nga individë jashtë interesave të Kosovës dhe për interesa të personave dhe klaneve të dyshimta, në kundërshtim me aspiratat e Republikës së Kosovës për integrim në BE dhe NATO.

Gjeneratat e reja duhet të edukohen në frymën tradicionale

Martesat ndërmjet personave të së njëjtës gjini në Kosovë, a mendoni se duhet të lejohen?

Dedaj: Qëndrimi i PLK-së është i përafërt me legjislacionin e Bashkimit Europian dhe standardet demokratike, të cilat janë shumë rigoroze në respektimin e të drejtave individuale dhe njerëzore, duke përfshirë edhe çështjen e legalizimit të martesave të personave të së njëjtës gjini. Edhe këta persona janë pjesë e çdo shoqërie, që duhet të mbrohen me ligj nga çfarëdo forme e diskriminimit eventual për shkak të bindjeve dhe përcaktimeve të tyre seksuale dhe jetësore, dhe askush nuk ka të drejte t’i anatemojë ose diskriminojë nëse ata e zgjedhin vet mënyrën e jetesës së tyre.

Shoqëria duhet t’i edukojë gjeneratat e reja në frymën e shëndoshë, të jetës tradicionale të natyrshme…

Se sa është e drejtë apo e natyrshme ajo zgjedhje, është çështje e tyre, por edhe e vet shoqërisë e cila duhet t’i edukojë gjeneratat e reja në frymën e shëndoshë, të jetës tradicionale të natyrshme, por edhe në kuadër të specifikave të shoqërisë shqiptare, e cila po kalon një transformim nga një shoqëri patriarkale konservatore në një shoqëri komerciale të re dhe demokratike, dhe në këtë fazë shfaqen dukuri jo të natyrshme dhe ndonjëherë të papranueshme për shoqërinë tonë tradicionale.

Pro apo kundër abortit?

Dedaj: Aborti është e drejtë personale dhe familjare dhe kjo e drejtë nuk duhet të sanksionohet më asnjë normë apo ligj, sepse është çështje individuale e një nëne se a dëshiron ta lindë fëmijën apo jo, respektivisht e një çifti bashkëshortor se a donë të kenë fëmijë apo jo. Pra, liberalët e tolerojnë dhe e mbështesin të drejtën e abortit legal, përmes institucioneve legale të shëndetësisë dhe mjekësisë, duke ruajtur gjithnjë shëndetin e nënës dhe partnerëve.

Dallimet mes njerëzve a janë natyrore apo më shumë konstruktime sociale?

Dedaj: Filozofët e vjetër thoshin se të gjithë njerëzit lindin të barabartë dhe si “tabula rasa” dhe si e çfarë do të ndërtohen e krijohen, janë shumë faktorë të cilët gjatë zhvillimit ndikojnë në personalitetin e tij fizik, psikik, kulturor, ekonomik e social. Pra është rrethi familjar, ai shkollor, familja, institucionet, dhe shumë faktorë tjerë të cilët ndikojnë në krijimin e dallimeve mes njerëzve dhe konstruksionet e tyre sociale e njerëzore. Ne si shoqëri e re dhe fillestare demokratike duhet të investojmë shumë në individin si pjesë e shoqërisë, dhe veçanërisht në gjeneratat e reja të cilave duhet t’u ofrojmë kushte dhe shanse të barabarta për jetë, edukim cilësor, rend e ligj, si dhe barazi sociale.

Në Kosovë nuk ka parti të djathta

Keni qenë partner koalicioni me PDK-në. PDK a është e djathtë apo e majtë?

Dedaj: PLK nuk është shumë në favor të ndarjes së partive politike në të djathta ose të majta, sepse ne liberalët më mirë do ta kishim shtruar çështjen e profilizimit të partive politike në ato popullore, demokratike, liberale, socialiste, konservatore, nacionaliste, ambientaliste ose fetare. Nuk mjafton të thuash në televizion: “Ne jemi të djathtë”, apo “ne jemi të majtë” dhe kaq. Kjo nuk thotë asgjë në politikë dhe në Kosovë asnjë parti politike nuk është e djathtë. Kosova nuk ka elemente as parakushte  të djathtizmit, i cili është një luks për Kosovën e varfër dhe qytetarët e saj të cilët luftojnë për të mbijetuar nga skamja dhe papunësia. Pra, partitë politike dhe orientimin e tyre e përcakton programi dhe qasja e tyre ndaj problemeve sociale, procesi i privatizimit, ligji mbi pronën, reformat në drejtësi dhe legjislacion, programi nacional për investimet e kapitalit dhe kompanive ndërkombëtare, sistemi fiskal dhe funksionimi i bankave, dhe jo çfarë shkruhet e thuhet në një program apo kongres të ndonjë partie politike nga zyrtarët e saj.

 
Gjergj Dedaj  


Pro privatizimit. Kompanitë turke me kapital të dyshimtë.

A duhet të privatizohen PTK dhe KEK-u?

Dedaj: PLK mbështetë procesin e privatizimit, pronën private dhe ekonominë e tregut të lirë por gjithnjë në suaza të normave dhe standardeve të shanseve të barabarta dhe pa ndërhyrje politike e partiake. Në masën më të madhe, privatizimi në Kosovë është politizuar dhe është një privatizim i egër nën mbikëqyrjen e grupeve dhe klaneve të interesit. Nuk ishte inkurajues dhe transparent privatizimi i Aeroportit të Prishtinës, pastaj i Distribucionit të KEK-ut dhe shumë ndërmarrjeve tjera publike. Nuk duket se është transparent as procesi i privatizimit të PTK-së dhe KEK-ut dhe ndërhyrjet politike të klaneve të caktuara e dëmtojnë këtë proces dhe i përjashtojnë kompanitë serioze amerikane apo europiane duke i zëvendësuar me ato turke, aziatike etj., të cilat nuk janë dobiprurëse, kanë kapital të dyshimtë, bëhet shpëlarje parash dhe e dëmtojnë në themel ekonominë e Kosovës.

S’jemi të gatshëm për energji alternative

A është e gatshme Kosova për energji alternative?

Dedaj: Kosova nuk është e gatshme për energji alternative edhe pse ajo është shumë e nevojshme. Kosova duhet të mendojë për të përmbushur nevojat e qytetarëve dhe të ekonomisë se saj me burime energjetike të cilat janë bazë e zhvillimit ekonomik, por gjithnjë duke menduar në mbrojtjen e ambientit dhe të natyrës dhe të zhvillojë me prioritet politikat kundër ndotjes së ambientit si shkaktare të sëmundjeve kancerogjene dhe dëmtimit të shëndetit të banorëve të saj. Për këtë arsye, Kosova duhet të ndjekë politikat globale të energjetikës dhe të bashkëpunojë me vendet e zhvilluara për të siguruar infrastrukturën për energji alternative.

Investimet në infrastrukturën rrugore a i përkrahni?

Dedaj: Infrastruktura rrugore është bazë e zhvillimit ekonomik, lëvizjes së lirë, komunikimit rajonal dhe më gjerë dhe ky segment i zhvillimit afatmesëm dhe afatgjatë i Kosovës duhet të përfshihet në vazhdimësi në të gjitha programet e zhvillimit ekonomik dhe të mbështetet edhe nga buxheti i Kosovës, donatorët ndërkombëtarë dhe investitorët e kompanive prestigjioze europiane dhe botërore.

Infrastruktura rrugore është bazë e zhvillimit ekonomik, lëvizjes së lirë, komunikimit rajonal dhe më gjerë.

Ndërtimi i autostradës Durrës-Prishtinë-Merdare, pastaj projekti Prishtinë- Shkup, lidhja me autostradë e qyteteve të Kosovës si: Prishtinë-Mitrovicë, Dardanë-Gjilan, Ferizaj-Prishtinë, Prishtinë-Klinë-Pejë-Gjakovë, e kështu me radhë, si dhe projektet e rrugëve rurale janë parakusht i zhvillimit ekonomik të Republikës së Kosovës.

Faturat e shtrenjta mund të qojnë në destabilizim të vendit

Faturat e KEK-ut a janë të larta?

Dedaj: Mendoj se ka hapësirë për një hetim gjithëpërfshirës kur bëhet fjalë për KEK-un i cili është apostrofuar shumë herë për korrupsion dhe fryrje të faturave, dhe aty duhet bërë ndryshime, hetime dhe korrigjime. KEK-u është në shërbim të qytetarëve dhe jo të KEK-ut sepse qytetarët e Kosovës, ndër më të varfëritë në Europë dhe ndoshta ndër më të varfëritë në botë, paguajnë shumë shtrenjtë energjinë elektrike, paguajnë tepër shtrenjtë shërbimet e telekomunikimit dhe shërbimet tjera, dhe për këtë arsye cilësia e jetës së qytetarëve të Kosovës është rrezikuar skajshëm dhe kjo mund të sjellë deri te trazirat sociale dhe destabilizimi i vendit.

Bankat – kamatat janë të larta apo janë OK?

Dedaj: Kamatat në bankat e Kosovës janë tepër të larta, ndëshkuese dhe rrezikojnë gjendjen sociale të klientëve të tyre, dhe se politikat bankare në Kosovë më shumë kanë qenë komerciale se sa politika të zhvillimit ekonomik dhe mbështetjes së ekonomisë së Kosovës, ekonomisë së vogël dhe asaj familjare të cilat janë sjellë para falimentimit për shkak të kamatave enorme të larta dhe disa nga bankat e Kosovës më shumë i kushtojnë kujdes përfitimeve të një klani të caktuar sesa mbështetjes ekonomike dhe zhvillimit të vendit.

Të ulen taksat për investitorët e fuqishëm dhe të rritet siguria

A e përkrahni tërheqjen e investitorëve të huaj në Kosovë përmes uljes së taksave për ta?

Dedaj: Politikat e uljes së taksave për investitorët e huaj janë vetëm njëra hallkë e zinxhirit për të joshur ata të investojnë në Kosovë. Para së gjithash janë edhe faktorë tjerë të cilët i trimërojnë dhe inkurajojnë investitorët e huaj të investojnë në Kosovë si p.sh: shkalla e sigurisë së tyre dhe kapitalit të tyre, luftimi i korrupsionit dhe krimit të organizuar, funksionimi normal i sistemit bankar, lëvizja e lirë, stabiliteti politik dhe faktorë të tjerë të cilët krijojnë një klimë të mirëbesimit për investitorët e huaj. Në të kundërtën në Kosovë gjoja do të investojnë matrapazët, të korruptuarit, kompanitë fiktive dhe kështu sistemi investues do të rrezikohet, pamundësohet dhe do degradoj në Kosovë.

Kabineti i numërt i Thaçit nuk është problem

Ju duket i numërt kabineti i Thaçit?

Dedaj: Nuk është gjithherë shkaktar (i performancës jo të kënaqshme) numri i ministrive, sasia e tyre, sa është domethënëse dhe krruciale efektshmëria, profesionalizmi, transparenca, llogaridhënia dhe përgjegjësia e punës së zyrtarëve të Qeverisë së Republikës së Kosovës. Në kabinetin Thaçi ka ministra të zotë dhe profesionistë, por ka edhe të atillë të cilët kanë treguar performancë jashtëzakonisht të dobët, infantile dhe joprofesioniste. Qeveria nuk duhet të bëhet institucion i punësimit të kuadrove partiake por i kuadrove të zotë dhe profesionistë për fushëveprimin e dikasterit të cilin e drejton një zyrtar i qeverisë. Ka edhe ministra të atillë që aty janë për shkak të Planit Ahtisaari, koalicionit, numrave, përkatësisë etnike, asaj partiake ose edhe të nepotizmit, dhe këto praktika degradojnë funksionimin dhe azhurnimin e cilitdo kabinet qeveritar.

E them dhe e rithem: Qeveria Thaçi duhet të fitojë Nobel
 
Keni thënë njëherë se Qeveria Thaçi duhet të fitojë Nobel Prize…?

Dedaj: Kam thënë dhe po e përsëris se Qeveria Thaçi, Kuvendi Krasniqi dhe Presidenca Sejdiu e vitit 2008 e meritojnë Çmimin Nobel sepse ishin këto institucione të cilat më 17 Shkurt 2008 e shpallën Deklaratën e Pavarësisë së Republikës së Kosovës duke jetësuar kështu sakrificat dhe martirizimin Biblik të popullit shqiptar gjatë shekullit dhe dekadave të fundit, luftën e UÇK-së dhe ndihmën vendimtare të SHBA-së, Europës dhe NATO-s për shtetin e Kosovës.

Kam thënë dhe po e përsëris se Qeveria Thaçi, Kuvendi Krasniqi dhe Presidenca Sejdiu e vitit 2008 e meritojnë Çmimin Nobel.

Dhe nuk konsideroj se kam bërë asnjë gabim me këtë deklaratë e cila më vonë është keqinterpretuar dhe nuk më bën kjo fare përshtypje. Çdonjëri e din se shteti i Kosovës është meritë e popullit të Kosovës dhe e të gjithë atyre të cilët e kanë ndihmuar këtë projekt njerëzor, kombëtar, politik dhe demokratik në forma dhe me mjete të ndryshme.

Duhet të kemi ushtri të armatosur

Çfarë mendoni për shndërrimin e FSK-së në ushtri dhe a duhet të ketë Kosova ushtri të fortë?

Dedaj: Kosova duhet të ketë ushtrinë e saj dhe atë në një afat optimal si çdo vend tjetër sovran, një ushtri të armatosur, profesionale, me ekspertizë të NATO-s dhe të stërvitur mirë në SHBA dhe Europë. FSK-ja duhet të depolitizohet dhe të integrohet sa më parë në Aleancën Veri-Atlantike të NATO-s, e gatshme për të mbrojtur kufijtë e Kosovës, lirinë dhe rendin kushtetues dhe të marrë pjesë në operacionet e NATO-s.

A do të ishte më mirë që qytetarët shqiptarë të pjesës veriore të kenë nga një  armë në shtëpi të tyre?

Dedaj: Pjesa veriore e Republikës së Kosovës është problem politik dhe një çështje e cila duhet të zgjidhet nga politikat e SHBA-së dhe BE-së, të cilat e kanë njohur Republikën e Kosovës në kufijtë e saj dhe duhet të garantojnë sovranitetin e shtetit të Kosovës duke ruajtur paqen dhe stabilitetin në Kosovë dhe rajon.
Enklavizimi, kantonizimi dhe ndarja e Kosovës në vija etnike është ide e rrezikshme e cila do të prodhojë vetëm konflikte. Plani i ish-Presidentit Martti Ahtisaari dhe Kushtetuta e Kosovës janë dokumentet bazë mbi të cilin duhet të bazohet çdo zgjidhje për pjesën veriore të Kosovës. Armatosja e banorëve në mënyrë individuale nuk është zgjidhje, sepse arma e qytetarëve të Kosovës në paqe është Kushtetuta, ligji, institucionet dhe vota e lirë dhe ata të cilët kanë marrë përgjegjësinë e votës duhet t’i mbrojnë qytetarët në çdo milimetër të Kosovës përkitazi me Kushtetutën e Republikës së Kosovës.

Burg i përjetshëm, e jo legalizim të marijuanës

A duhet të legalizohet marijuana?

Dedaj: Jo, asnjë lloj droge ose produkti i cili rrezikon shëndetin, të ardhmen dhe jetën e qytetarëve të Kosovës nuk duhet të legalizohet, por përkundrazi duhet në mënyrë rigorozë të sanksionohet me ligj.

Asnjë lloj droge ose produkti i cili rrezikon shëndetin, të ardhmen dhe jetën e qytetarëve të Kosovës nuk duhet të legalizohet.

Askush nuk ka të drejtë që për përfitime materiale të klaneve mafioze të shkatërrojë jetën dhe shëndetin e të tjerëve dhe dënimet për këto lloje të produkteve shkatërrimtare duhet të jenë edhe më të larta dhe ndoshta me burgim të përjetshëm.

A ju pëlqen më shumë Nicholas Sarkozy apo tash Franqois Hollande?

Dedaj: Mendoj se Sarkozy ishte më karizmatik, më human dhe më pragmatik. Po të kisha të drejtë vote në atë kohë të zgjedhjeve në Francë, me dëshirë do të votoja për Sarkozyn.

Serbët e turqit tepër të favorizuar

Serbët a kanë mundësi  të shkollimit të lartë në Kosovë?

Dedaj: Kosova është shembull pozitiv unikat për të drejtat e komuniteteve pakicë dhe për këtë mund të krahasohet me Zvicrën, vendet skandinave dhe ato anëtare të BE-së. Në veçanti komuniteti serb është i favorizuar në krahasim me komunitetet e tjera pakicë në Kosovë dhe kjo nuk do të duhej të ishte kështu. Të gjitha komunitetet pakicë duhet t’i gëzojnë të drejtat e barabarta. Serbët e Kosovës janë të mbiçmuar dhe mbipopulluar në institucionet e Kosovës, në qeveri, pushtetin lokal, punësim, shkollim, përdorim të gjuhës serbe si gjuhë zyrtare, pra në emër të diskriminimit pozitiv.

Kosova është shembull pozitiv unikat për të drejtat e komuniteteve pakicë dhe për këtë mund të krahasohet me Zvicrën, vendet skandinave…

Po t’i krahasojmë komunitetin pakicë, shqiptarët në Serbi, ata atje janë të diskriminuar. Edhe komuniteti turk në Kosovë gëzon të drejtat dhe përfaqësohet mirë, çka ta zëmë nuk ndodhë me miliona shqiptarë të shpërngulur në Turqi të cilët nuk kanë as të drejtën e deklarimit etnik, të shkollimit, gjuhës, informimit dhe flamurit, të cilat turqit në Kosovë i gëzojnë. Madje ministrat dhe zyrtarët e Turqisë pa të drejtë tentojnë të na japin leksione të rrejshme dhe madje ta ndërrojnë historinë tonë dhe tekstet shkollore kur dihet se Perandoria Otomane ishte okupatore, vrastare dhe gjakatare në trojet shqiptare siç ishte edhe vetë regjimi i Milosheviqit.

Grupet fundamentaliste islamike në Kosovë duhet të jenë non-grata

A janë mirë të integruar ndërkombëtarët në Kosovë dhe a duhet të lehtësohet dhënia e azilit?

Dedaj: Prezenca ndërkombëtare në Kosovë është e mirëseardhur qoftë ajo e NATO-s, respektivisht KFOR-it, e EULEX-it, OSBE-së, misioneve diplomatike, institucioneve ekonomike, mekanizmave të sigurisë, luftës kundër terrorizmit etj. pra, kjo prezencë garanton stabilitetin, rendin dhe ligjin por edhe tërësinë dhe integritetin e Kosovës. Ndërkombëtarët duhet të respektohen, se shteti i Kosovës ishte projekt i përbashkët i vendorëve me miqtë tanë ndërkombëtarë të cilëve duhet dhënë edhe nënshtetësinë nëse e kërkojnë, dhe të drejtën e azilit nëse dëshmojnë se janë të rrezikuar nga vendi prej nga vijnë. Një kujdes tjetër dhe i shtuar duhet të merret parasysh ndaj grupeve fundamentaliste islamike dhe atyre me pretendime terroriste për të cilat Kosova duhet të jetë një territor dhe vend i papërshtatshëm dhe të tillët duhet të jenë non-grata në Kosovë.

A mbani ndonjë kafshë në shtëpi?

Dedaj: Jo nuk mbajmë kafshë në shtëpi, sepse Prishtina nuk i plotëson nevojat elementare për të pasur një spital për kafshët të cilat duhet të kontrollohen për t’u mbajtur në shtëpi ose një hotel për kafshët kur udhëtojmë jashtë Prishtinës, kafsha të dërgohet në hotelin adekuat deri sa të kthehet familja nga rruga.

A e përkrahni vrasjen e qenve dhe kafshëve tjera të rrezikshme për të cilat po ankohen shumë njerëz?

Dedaj: Jo, nuk e përkrah fare vrasjen e qenve endacakë dhe kafshëve tjera nëpër rrugët e qyteteve tona, kjo është një pamje bizare dhe e pa pëlqyer. Për këtë arsye duhet të mendohen institucionet veterinare për kafshët dhe mbrojtjen e tyre me ligj.

Nëse do të kishim kushte të tilla për kontrollin e shëndetit dhe gjendjes së tyre, të vendosjes së tyre në objektet e caktuara në mungesë të familjes, atëherë kafshët do të qëndronin nëpër familje si kudo.

Nëse do të kishim kushte të tilla për kontrollin e shëndetit dhe gjendjes së tyre, të vendosjes së tyre në objektet e caktuara në mungesë të familjes, atëherë kafshët do të qëndronin nëpër familje si kudo në Paris, Londër, Berlin etj. dhe jo të vriteshin me armë nëpër rrugë.

Për vete, a jeni më shumë individualist apo person i veprimit grupor?

Dedaj: Më shumë jam individualist sepse jeta më ka mësuar dhe imponuar të jem i tillë. Shumë punë dhe aktivitete të cilat ua dedikoj njerëzve të tjerë i kam bërë vetëm, pa përkrahje dhe kujdesin e askujt që nga koha e studimeve, angazhimit politik, aktivitetit ndërkombëtar kudo në botë për çështjen e Kosovës mbi dy dekada pa reshtur, anëtarësimit të PLK në Internacionalen Liberale me seli në Londër dhe ALDE – Euroliberalët me seli në Bruksel, pra e them pa modesti se kam treguar individualizëm të paparë dhe në këtë rrugëtim të përgjakshëm ka pasur edhe të tjerë, anëtarë dhe miq që më kanë përkrahur por ishin të paktë. Vlerat liberal-demokratike perëndimore të promovohen para, gjatë dhe pas luftës në Kosovë ka qenë vërtet një sakrificë për kohën dhe hapësirën e veprimit, dhe këtu ka ardhur në shprehje individualizmi, edhe pse puna grupore është më e lehtë, më dobiprurëse dhe mund të garantojë sukses më të madh.