PDK-ja Mbetet në Bordin e Ujësjellësit, Ndërron Vetëm Emri i Anëtarit
Pas dorëheqjes së Ardian Sylës nga Bordi i Ndërmarrjes Rajonale të Ujësjellësit “Prishtina”, Qeveria ka plotësuar këtë vend me një tjetër njeri të PDK-së.
Florin Dvorani është emëruar anëtar bordi, ndërsa ishte asamblist i PDK-së në Kuvendin Komunal të Drenasit. I afërt me PDK-në është edhe Ardian Syla, por ai është “deleguar” në Bordin e Trepçës.
Kryeministri Haradinaj vazhdon të marrë vendime në kundërshtim me veprimet që i kishte bërë në fillim të mandatit kur kishte shkarkuar disa anëtarë të bordeve të ndërmarrjeve publike duke u thirrur në një vendim/opinion të Agjencisë Kundër Korrupsionit.
E AKK-ja në vendimin e saj kishte konstatuar se Qeveria Mustafa kishte emëruar nëpër borde persona me të kaluar politike, në kundërshtim me Ligjin për Ndërmarrjet Publike. Neni që ishte shkelur kërkonte që anëtarët e bordit të ndërmarrjeve të publike të mos kenë pozita nëpër parti në 36 muajt e fundit.
I kontaktuar nga Gazeta Jeta në Kosovë, Dvorani insistonte se ishte i zënë dhe nuk kishte kohë të fliste. Ai konfirmoi që është zgjedhur anëtar i këtij bordi, por në pyetjen se a ka dhënë dorëheqje nga PDK, tha shkurt:
“Jom nxan, hej. S’jam unë kërkun n’aktivitete. S’jam unë n’këto formue. Tung”.
Por, aktiviteti i tij në facebook është e kundërta. Ai vitin e kaluar ka shpërndarë aktivitete të kreut të partisë, Kadri Veseli dhe kreut të Komunës së Drenasit, Ramiz Lladrovci dhe në disa raste shihet në shoqëri me ta.
Sipas Kryeministrit, Ramush Haradinaj, Dvorani ka qenë në listën e pritjes së kandidatëve të zgjedhur paraprakisht në konkursin e vitit 2015.
“Një anëtar bordi ka kaluar në përgjegjësi tjetër dhe pozita ka mbetë vakum. Plotësimi me kandidatin që është në pritje në listën e përzgjedhur paraprakisht ka rezultuar që është Florin Dvorani”, tha kryeministri në mbledhjen e Qeverisë.
Dvorani ka qenë asamblist i PDK-së para dy mandateve në komunën e Drenasit.
Anëtarët e bordit të KUP Prishtina ishin emëruar më 30.10.2015, në kohën kur në bashkëqeverisje ishin PDK dhe LDK.
Ndryshe, për emërimet e kundërligjshme dhe politike të bordit të Trepçës Gazeta JNK ka shkruar javën e kaluar. Ndër anëtar i zgjedhur në këtë bord është edhe i dorëhequri nga KUP Prishtina, Ardian Syla.
Qeveria Emëron Kundërligjshëm Anëtarë të Bordit të ‘Trepçës’
