Dhuna në Media Nxit Dhunën në Jetë

Disa studiues thonë se varfëria dhe pabarazia sjellin dhunë. Studimet thonë se përqindja më e madhe e vdekjeve të dhunshme kanë ndodhur në vendet më pak të zhvilluara. Por a janë vërtet më të dhunshëm të varfërit? Nga ana tjetër ka vende si Kalkuta në Indi ku miliona njerëz jetojnë në varfëri ekstreme, e megjithatë aty ka një shkallë vrasjesh nga më të ulëtat në botë.

Të tjerët mendojnë se shoqëria bëhet më e dhunshme atje ku mund të sigurohen më lehtë armët. Sigurisht, me armë në dorë njerëzit e dhunshëm bëhen më të rrezikshëm. Por pse në disa shoqëri ka më tepër njerëz të dhunshëm? Edhe për këtë ekspertët nuk bien dakord?

Bota sot është e fiksuar pas dhunës. Në të vërtetë dhuna ka qenë gjithmonë pjesë e “zbavitjes”. Megjithatë vitet e fundit diçka ka ndryshuar në lidhje me dhunën në media.

Së pari shfaqet më shpesh. Së dyti shfaqet shumë më hapur, shumë më sadiste dhe me natyrë më seksuale. Mendoni për fushat e mëposhtme: 

Muzika – Këngët me tekste gjithnjë e më të dhunshme konsiderohen si normale në industrinë e muzikës. Duke përdorur fjalë banale disa këngë lartësojnë vrasjen.

Videolojërat – Është shqetësues fakti që në videolojëra vërehet mania për gjakderdhje. Disa autoritete besojnë se videolojërat mund të ndikojnë të fëmijët shumë më keq sesa televizori.

Filmat – Studimet tregojnë se dhuna dhe gjuha vulgare janë rritur ndjeshëm nëpër filma, dhe simbolet që tregojnë se përçfarë moshe është një film, mund të mos jenë të besueshme. Për më tepër nuk janë të dhunshëm vetëm personazhet negative. Sipas një studimi, pothuajse gjysma e dhunës në televizor, kryhet nga personazhet pozitive.

Interneti – Në internet gjen imazhe virtuale dhe të vërteta torturash dhe vrasjesh. Këto vrasje i shikojnë fëmijë të panumërt.

Pasojat shqetësuese të dhunës duhet të na bëjnë të mendojmë për veten, për etikën dhe bindjet tona. Kuptohet që nuk mund t`I shmangim të gjitha ndikimet e këqija. Por zgjedhjen e zbavitjes dhe të njerëzve me të cilët shoqërohemi, e kemi vetë në dorë.

Megjithëse lindim me disa prirje të gabuara, sjellja e dhunshme zakonisht mësohet. Kjo vlen edhe për sjelljen paqësore. 

Duhet ta kuptojmë se forca e vërtetë duket te cilësi të tilla si vetëkontrolli dhe butësia. “Kush nuk zemërohet shpejt, është më mirë se një burrë i fuqishëm’, thotë një proverb. Por kush ka prirjen të zemërohet shpërthen edhe nga provokimi më i vogël. 

Gjithashtu është shumë e rëndësishme të shoqërohemi me njerëz paqësorë që kanë vetëkontroll dhe butësi sepse ka shumë të ngjarë që do të përpiqemi t`i imitojmë. Pra ne mund të mësojmë të jemi paqësorë.

(Autorja ka magjistruar në Psikologji)