Familja Hoxha Kërkon Përshpejtim të Rastit ndaj Limajt
Familja Hoxha nga Bellanica është e indinjuar me zvarritjen, sipas saj, të procesit gjyqësor ndaj Fatmir Limajt, i cili po gjykohet për vrasjen e familjarit të tyre, Ramizit, më 2 tetor 1998.
Kjo familje, e cila në këtë gjykim është palë e dëmtuar, kërkon nga organet e drejtësisë të Kosovës që të marrin masa që procedura gjyqësore të zhvillohet sa më shpejt.
Në një letër dërguar në KALLXO.com, Fadil Hoxha thekson se familja është thellësisht e indinjuar me zhvillimin e procedurës dhe se ajo po dëmtohet nga zvarritjet.
Hoxha kujton se për seancën e paraparë për dje ka ardhur nga Sllovenia. Dhe vetëm kur ka hyrë në sallë e ka kuptuar se seanca nuk do të mbahej, për shkak se i akuzuari Limaj dhe mbrojtësi i tij e kishin njoftuar Gjykatën se nuk do të vinin për shkak të gjendjes shëndetësore të avokatit.
Sipas Hoxhës, ndërkohë që po bëhet gati një vit që nga ngritja e aktakuzës, deri më tani është mbajtur vetëm seanca e fjalës hyrëse.
http://kallxo.com/fatmir-limaj-perballet-me-akuzen-per-krimet-ne-bellanice/
Ai ankohet për zvarritjen e procesit, duke kujtuar se një herë i kanë marrë thirrjet për fillimin e gjykimit për në muajin maj, e pastaj janë njoftuar për shtyrjen për në gjysmë të qershorit.
“Ne e kemi kundërshtuar kërkesën e avokatit Rrecaj, i cili në fjalën hyrëse kërkoi që të gjitha provat dhe dëshmitë vetëm të lexohen. Unë kam kërkuar të vinë të gjithë dëshmitarët në proces”, thekson Fadil Hoxha, djali i Ramiz Hoxhës, i cili bashkë me Selman Binishin nga Banja janë ekzekutuar më 2 tetor 1998 nga persona të maskuar, për të cilët Prokuroria Speciale pretendon se kanë qenë ushtarë të UÇK-së dhe se zona në atë kohë ishte nën përgjegjësinë e të akuzuarit Limaj.
Nga ajo seancë, sipas tij, kanë kaluar 80 ditë deri në seancën e djeshme, e cila nuk u mbajt për shkak se mbrojtja e të akuzuarit e kishte njoftuar Gjykatën se nuk do të vinin për shkak të gjendjes shëndetësore të avokatit Tahir Rrecaj.
KALLXO.com raportoi për mosmbajtjen e kësaj seance.
http://kallxo.com/avokati-limajt-semure-shtyhet-seanca/
Aktakuza e ngarkon të pandehurin Fatmir Limaj se si pjesëtar i UÇK-së dhe komandant i Brigadës 121, nuk ka ndërmarrë masa të arsyeshme dhe të nevojshme brenda kompetencave të tij për ta parandaluar apo për të ndalur vrasjen e Ramiz Hoxhës dhe Selman Binishit.
Sipas Prokurorisë Speciale Ramiz Hoxha nga fshati Bellanicë dhe Selman Binishi nga fshati Banjë, komuna e Malishevës, më 2 tetor 1998 janë marrë në afërsi të xhamisë së fshatit Bellanicë dhe janë ekzekutuar në hyrje të fshatit Kravasari.
Prokuroria në aktakuzë pretendon se Fatmir Limaj i ka parë kufomat e viktimave dhe e ka ditur për krimin e kryer, mirëpo me vetëdije nuk ka ndërmarr masa drejt zbulimit të kryesve të këtij krimi dhe rastin asnjëherë nuk e ka paraqitur te organet kompetente për hetim dhe ndjekje.
Emisioni “Drejtësia në Kosovë” në nëntor të vitit të kaluar shfaqi hulumtimin në dy vazhdime në të cilin familjarë të viktimave që u morën në Bellanicë në vitin 1998 treguan se si ndodhi ky rast.
http://kallxo.com/drejtesia-ne-kosove-si-u-vra-ramiz-hoxha-nga-bellanica/
