Erdogan planifikon të mbajë tubime zgjedhore në Europë

Presidenti turk, Recep Tayyip Erdogan tha sot se planifikon të mbajë tubime zgjedhore në Europë muajin e ardhshëm, por nuk tregoi se në cilat shtete do t’i mbajë këto tubime.

Erdogan, gjatë një takimi të Partisë së tij për Drejtësi dhe Zhvillim (AKP) tha se këto tubime janë planifikuar të mbahen nëpër salla sportive.

“Në maj do të mbajmë takimet tona të para në sallat sportive në Europë. Të gjitha përgatitjet janë bërë. Tash për tash, nuk dua të tregoj se në cilat shtete do të mbajmë tubime”, tha Erdogan.

Vitin e kaluar, gjatë fushatës për referendum, Erdogan ishte përplasur me liderët europianë, pasi partia AKP kishte mbajtur tubime zgjedhore në Europë, ku jeton diaspora turke.

Gjermania, Holanda dhe Austria kishin ndaluar këto tubime.

Javën e kaluar, Erdogan shpalli zgjedhjet e parakohshme parlamentare dhe presidenciale.

Ato do të mbahen më 24 qershor.