Edhe një Kosovar Vritet në Siri

Edhe një qytetar i Kosovës është vrarë në konfliktin e Sirisë.

KALLXO.com merr vesh se ky person është nga fshati Palabardh i komunës së Gjakovës.

Sipas burimeve të KALLXO.com, familjarët tashmë janë njoftuar për vdekjen e anëtarit të familjes dhe po përgatiten të hapin të pame.

Të njëjtat burime nuk kanë sqaruar rrethanat e vdekjes së këtij qytetari të Kosovës në vendin e Lindjes së Mesme i përfshirë dhe shkatërruar nga lufta.

Me gjithë përpjekjet, KALLXO.com nuk ka arritur të kuptojë se kur kishte shkuar në Siri ky shtetas i Kosovës dhe nëse ka qenë pjesë e ndonjë organizate ekstremiste që po lufton atje.

Në qershor KALLXO.com raportoi se familja e Lavdrim Muhaxherit hapi të pame për vdekjen e tij në Siri.

http://kallxo.com/video-e-pamja-per-lavdrim-muhaxherin-ne-kacanik/

Muhaxheri konsiderohej si komandant i shqiptarëve që luftonin nën flamurin e organizatës terroriste ISIS në Siri e Irak.

Përveç Muhaxherit, në luftën në Siri e Irak janë vrarë edhe dhjetëra qytetarë të Kosovës.

Vitin e kaluar, kur ka raportuar para Komisionit për Siguri, ish-ministri i Brendshëm, Skender Hyseni, ka thënë se sipas informacioneve që posedonte Ministria, në Siri e Irak janë vrarë 57 qytetarë të Kosovës.

http://kallxo.com/afer-140-kosovare-ne-lufterat-ne-siri-e-irak/

Sipas ish-ministrit, në këto dy vende ishin ende 70 kosovarë luftëtarë aktivë si dhe 38 gra e 27 fëmijë.