Bujar Hasani, ish-drejtor komunal i Urbanizmit në Prizren. Foto: Kallxo.com
Drejtori Deklarohet i Pafajshëm për Konstruksionin në Qendrën Historike
Bujar Hasani, drejtori i Inspektorateve në Komunën e Prizrenit u deklarua i pafajshëm për shpërdorim detyre në lidhje me akuzat për ndërtimin e një konstruksioni metalik në Zonën Historike që është pronë komunale.
Pafajësinë e deklaroi edhe Enver Bytyqi, inspektori i ndërtimeve në Komunën e Prizrenit që akuzohet se nuk e pengoi shefin e tij për ta ndërtuar konstruksionin.
Drejtori Hasani akuzohet edhe për uzurpim të paligjshëm të pronës se paluajtshme.
Sipas aktakuzës, Bujar Hasani ngarkohet se si drejtor i Inspektorateve për të përfituar për vete nuk ka larguar konstruksionin metalik në Zonën Historike të Prizrenit.
Konstruksioni metalik, sipas prokurorisë, ishte vazhdim i lokalit “Fellas”, pronë e Bujar Hasanit.
Aktakuza tregon se prej janarit 2015 e deri tash Hasani ka uzurpuar në mënyrë të kundërligjshme pronën e paluajtshme të Komunës së Prizrenit në Zonën e Mbrojtur të qytetit.
Enver Bytyqi akuzohet se nga viti 2015 e deri tash nuk ndërmori inspektime për të iniciuar largimin e konstruksionit metalik të vendosur nga shefi i tij.
Gazeta Jeta në Kosovë në prill të këtij viti shkroi për shfrytëzimin e kundërligjshëm të pronës komunale nga drejtori Bujar Hasani.
Drejtori i Inspektoratit në Prizren Shfrytëzon Kundërligjshëm Pronën Publike
Pesë muaj pas hulumtimit të Gazetës Jeta në Kosovë, u ngrit aktakuza ndaj Hasanit.