Deklaratë e Ministrit Besim Beqaj Pas Aktakuzës në Rastin ‘Pronto’

Ministri i Inovacionit dhe Ndërmarrësisë, Besim Beqaj, ka lëshuar një deklaratë me shkrim pas njoftimit se Prokuroria Speciale ka ngritur aktakuzë ndaj tij në rastin e njohur si ‘Pronto’.

Në këtë deklaratë, ministri Beqaj, i cili ka qenë ndër protagonistët e telefonatave ndërmjet zyrtarëve të lartë të PDK-së, tha se është i bindur se nuk ka bërë shkelje ligjore apo tejkalim të kompetencave.

Lexojeni në vijim deklaratën e plotë të ministrit Besim Beqaj:

“Viti 2018 është viti i 15-të i punës sime si përgjegjës institucional i nivelit të lartë. Gjatë këtyre viteve, secilën pozitë e kam ushtruar me përgjegjësi profesionale dhe në përputhje të plotë me ligjet e Republikës së Kosovës dhe me standardet më të larta ndërkombëtare.

Sot nga mediat kam kuptuar se procesi hetimor lidhur me rastin e përgjimeve ka rezultuar me aktakuzë nga Prokuroria Speciale e Kosovës, gjë të cilën edhe e kam pritur, marrë parasysh zhvillimet politike në vend. Megjithatë, kam pritur që konform rregullave të njoftohem zyrtarisht nga organet përgjegjëse.

Unë, me vetëdije të plotë dhe në harmoni të plotë me ligjet e Kosovës i kam kryer detyrat e mia në zbatimin e politikave të Qeverisë së Kosovës. Punën e secilit zyrtar të lartë shtetëror e definojnë politikat qeveritare të paraqitura me program qeverisës dhe ligjet e zbatueshme në Kosovë. Ligjet e definojnë qartë përgjegjësinë institucionale për rastin në fjalë dhe kompetencat për vendimarrje institucionale. Konform këtyre ligjeve dhe politikave qeveritare unë jam plotësisht i bindur se në asnjë rrethanë nuk kam bërë shkelje ligjore dhe tejkalim të kompetencave institucionale e aq më pak keqpërdorim të tyre.

Unë, kam qenë dhe jam institucionalist dhe besoj se në Kosovë ka institucione të përgjegjshme dhe profesionale të cilat do e trajtojnë në hollësi rastin në fjalë. Unë jam i gatshëm, sikurse kam qenë deri më tani, të shpjegoj dhe të argumentoj secilin veprim timin politik dhe ligjor. Faktet e shkruara dhe dokumentet kanë gjithmonë më shumë vlerë se vlërësimet momentale dhe ato tendencioze.

Koha do të tregojë se të gjitha këto do të mbesin një histori e keqe për shtetndërtimin e Kosovës”, thuhet në deklaratën e ministrit Beqaj.