Lideri i BDI-së, Ali Ahmeti, në intervistën për emisionin "Jeta në Kosovë" - Foto: KALLXO.com

BDI s’e Përjashton Mundësinë e Koalicionit të Ri me Gruevskin

Ali Ahmeti tha se BDI ende po analizon katër opsione: një koalicion me VMRO DPMNE, një koalicion me socialdemokratët (LSDM), bashkimin në një qeveri “teknike” apo qëndrimin në opozitë.

Ali Ahmeti, lideri i partisë kryesore etnike shqiptare, Bashkimi Demokratik për Integrim, BDI, të mërkurën tha se BDI do të fillojë negociatat me VMRO DPMNE meqë partia ka marrë një mandat për të formuar qeverinë e ardhshme.

NDËRLIDHUR

Megjithatë, Ahmeti tha se ai nuk kishte vendosur nëse negociatat do të përfundonin apo jo me një rinovim partneriteti, pasi BDI ende po analizon katër opsione – një koalicion me VMRO DPMNE, një koalicion me socialdemokratët në opozitë, LSDM, bashkimin në një qeveri “teknike” apo qëndrimin në opozitë.

“Të gjitha opsionet janë të mundshme dhe ne po i analizojmë këto opsione seriozisht në nivelet më të larta të partisë”, tha Ahmeti të mërkurën në mbrëmje.

Si partia më e madhe që fitoi në zgjedhjet e 11 dhjetorit, VMRO DPMNE ka marrë mandatin nga presidenti për të formuar një qeveri.

Të martën, partia tha se do të ftonte BDI-në në negocimin e rinovimit të koalicionit, por nuk saktësoi se kur do të fillonin bisedimet.

VMRO DPMNE fitoi 51 nga 120 vende në Parlament, LSDM ka fituar 49 dhe BDI fitoi 10.

Pasi shumica e partive të tjera i kanë përjashtuar negociatat me VRMO DPMNE, shpresa e vetme për partinë është aleanca me BDI-në.

Ahmeti tha se negociatat nuk do të jenë të lehta dhe se ai nuk do të hyjë në qeverisje nëse partneri maqedonas nuk pranonte deklaratën e përbashkët të nënshkruar nga partitë etnike shqiptare më 7 janar.

Deklarata ka shtatë pika, pa afate konkrete të përmbushjes, por përmban ide që ato pretendojnë se do të siguronte barazi totale mes shumicës maqedonase dhe minoritetit shqiptar – që përbën një të katërtën e popullatës.

Partitë shqiptare duan që gjuha shqipe të bëhet zyrtare në të gjithë territorin, jo vetëm në zonat ku jetojnë me shumicë. Ata duan gjithashtu bisedime për ndryshimin e flamurit të vendit dhe himnit që të reflektohet edhe elementi shqiptar.

Ata vënë në qendër sundimin e ligjit dhe drejtësinë, barazinë ekonomike, integrim më të shpejtë në BE dhe NATO dhe marrëdhënie më të mira me fqinjët.

Nëse të katërta opsionet dështojnë, BDI thotë se vendi duhet të organizojë zgjedhje të reja.

Shumë vëzhgues thonë se një rinovim i aleancës VMRO DPMNE dhe BDI do të vinte në rrezik të dyja partitë.

Analisti politik Xhelal Neziri thotë se votuesit ndëshkuan të dyja partitë në zgjedhjet e dhjetorit kur humbën vota krahasuar me zgjedhjet e mëparshme dy vite më parë.

“Nëse kemi një qeveri të re mes këtyre partive humbja e mbështetjes do të jetë edhe më dramatike”, tha ai.

“VMRO DPMNE e ka ndërtuar pozicionin e vet bazuar te retorika e ashpër kundër shqiptarëve, ndërsa BDI me platformën e përbashkët që ka rritur pritshmëritë shqiptare kundrejt të drejtave të tyre kolektive”, theksoi analisti politik Xhelal Neziri.

Ai shtoi se një koalicion i ri do të zhgënjente si maqedonasit dhe shqiptarët etnikë dhe dy partitë do të humbnin mbështetjen e elektoratit të tyre.

Të dyja partitë e tjera të bllokut shqiptar, Besa, që fitoi pesë vende dhe PDSH – Lëvizja për Reforma, që fitoi tre, nuk do të marrin pjesë në negociata për një qeveri të re me VMRO DPMNE.

Ndërkohë LSDM i nxiti partitë politike shqiptare të martën të mos lejojnë njerëzit e akuzuar për akte kriminale të formojnë një qeveri të re.

Prokuroria Speciale, SJO, që është ngritur për të hetuar krimin në nivel të lartë, po heton disa zyrtarë të lartë të VMRO DPMNE.

Në emisionin “Jeta në Kosovë“, i transmetuar më 29 dhjetor 2016, liderët e partive shqiptare të Maqedonisë Ali Ahmeti (BDI), Bilall Kasami (Lëvizja BESA) dhe Ziadin Sela (Lëvizja për Reforma – PDSH), flasin për rezultatet e zgjedhjeve të 11 dhjetorit dhe mundësitë për koalicione.

Emisionin të plotë mund ta shikoni në linkun e mëposhtëm.

Kalkulimet e Shqiptarëve të Maqedonisë

 

11 Janar 2017 - 20:15

Semra Musai, BIRN, Shkup 11/01/2017 - 20:15
NDËRVEPRIMI0

BDI s’e Përjashton Mundësinë e Koalicionit të Ri me Gruevskin

by Kallxo
NA NDIQNI

Send this to a friend