Drogë e konfiskuar më parë nga autoritetet kosovare - Foto: Dogana e Kosovës
Arrestohet Serbi, i Gjenden mbi 13 Kilogramë Drogë
Policia e Kosovës ka arrestuar dje një shtetas të Serbisë në veturën e të cilit dje gjatë një kontrolli ka gjetur dhe konfiskuar mbi 13 kilogramë drogë të tipit marihuanë.
Operacioni është realizuar në rrugën magjistrale Prishtinë-Graçanicë, konkretisht në fshatin Hajvali.
I.A., serb, shtetas i Serbisë, është arrestuar si i dyshuar për veprën penale ‘blerje, posedim, shitje ose shpërndarja e paautorizuar e narkotikëve, substancave psikotrope ose analoge’.
Gjatë kontrollit, zyrtarët policorë në veturën e të dyshuarit kanë gjetur dhe kanë konfiskuar 25 paketime të mbushura me narkotikë të llojit marihuanë, pesha e të cilës ka rezultuar të jetë 13 kilogramë e 457.6 gramë, 10180 dinarë dhe 95 euro para të gatshme, dy telefona celularë.
Me vendim të prokurorit kompetent i dyshuari është arrestuar dhe është dërguar në qendrën e mbajtjes.