Aleksandar Vuçiq Garon për President të Serbisë

Vuçiq u bë favoriti i menjëhershëm për të fituar presidencën serbe, pasi lidershipi i Partisë Progresiste e shpalli atë si kandidatin e vet të favorizuar të martën.

Në një intervistë me transmetuesin publik RTS, pasi u shpall vendimi, Vuçiq ka portretizuar veten si kandidati që mund ta shpëtojë vendin nga shkatërrimi nga opozita.

“Kjo është një çështje me rëndësi për të ardhmen e Serbisë, për shkak se në muajt e fundit ne mund të shohim se si të gjithë ata që ishin duke shkatërruar vendin, që e çuan atë në prag të falimentimit dhe shkatërruan të ardhmen, dëshirojnë të kthehen në pushtet dhe ta shkatërrojnë Serbinë”, tha Vuçiq, duke iu referuar Partisë Demokratike të opozitës, e cila ishte në pushtet deri në vitin 2012.

Bojan Klacar, drejtor i Qendrës për Zgjedhje të Lira dhe Demokraci, CESID, tha për BIRN-in se vendimi i Vuçiqit për të kandiduar do t’u japë progresistëve një shans të mirë për të fituar presidencën pa një garë balotazhi.

“Duke pasur parasysh dy gjëra – vlerësimin e partisë, e cila është relativisht e lartë dhe ende në nivelin e zgjedhjeve të mëparshme dhe vlerësimi i Vuçiqit i cili është fytyra e tyre promovuese, dhe ai që po e gjeneron më të madhe tërë potencialin e [partisë], vendimi i tij ka rritur shanset e progresistëve [për të fituar]”, tha Klacar, megjithëse ai shtoi se fitorja nuk është e sigurt, sepse zgjedhjet bartin rreziqe.

Vuçiq në intervistën e tij me RTS tha se pa mbështetjen e presidentit aktual serb Tomislav Nikoliq, “shumë rezultate kaq të mira dhe të rëndësishme” nuk do të ishin arritur, dhe se Nikoliqi ka luajtur një “rol historik”.

“Kam ndërmend të punojmë së bashku me të, në qoftë se ai e dëshiron këtë”, tha ai duke shtuar se ishte takuar me Nikoliqin, por nuk deshi të diskutojë për detajet e “bisedimeve private” mes dy burrave.

Klacar tha se ai beson se vendimi i Vuçiqit nuk do të krijojë ndonjë tërmet në Partinë Progresive, duke shtuar se ky vendim përfshin një sërë kompromisesh dhe një paketë të përshtatshme për Nikoliqin për të siguruar pranimin e heshtur e tij.

“Mendoj se ata kanë vendosur të mos lejojnë dallimet e tyre në mendime, të cilat janë të dukshme, të bëhet një problem për partinë. Ne do të shohim se çfarë do të sjellin ditët përpara nesh, dhe çfarë përfitimesh do të marrë Nikoliqi”, tha ai.

Partnerët e koalicionit qeverisës të progresistëve, menjëherë dolën në mbështetje të kandidaturës së Vuçiqit.

Ai të martën mori mbështetje nga drejtuesit e Partisë Socialiste të Serbisë, Lëvizjes së Socialistëve, Partisë Sociale Demokratike të Serbisë dhe Serbinë Unike.

“Ky vendim është më i miri për Serbinë, i vetmi racionale dhe logjik. Fitorja e tij si kandidat i përbashkët garanton stabilitetin politik të Serbisë në periudhën e ardhshme”, tha për Tanjug të martën në mbrëmje Ivica Daçiq, lideri i Socialistëve, që është në partneritet me partinë e Vuçiqit.

Partitë e opozitës e argumentuan megjithatë se kandidatura e Vuçiqit do ta sjellë rrëzimin e qeverisë.

Kryetari i Partisë Demokratike, Dragan Shutanovac, u bëri thirrje votuesve që duan të ndryshojnë dhe të cilët besojnë se “Serbia mund të jetë një vend i shpresës dhe perspektivës” për ta mbështetur ish-avokatin e popullit Sasha Jankoviq në zgjedhjet e ardhshme.

“Fitorja e Sasha Jankoviq në zgjedhjet presidenciale do ta ndalojë spiralen e shkatërrimit të cilën e solli qeveria e Vuçiqit dhe në fund do të ketë një president për të gjithë qytetarët e Serbisë”, ka thënë Shutanovac.

Një tjetër kandidat i shpallur për president, Vuk Jeremiq, tha të martën në mbrëmje se fitorja e Vuçiqit në zgjedhjet presidenciale do të thotë “forcimi i politikës së keqe për një periudhë prej pesë vjetësh”.

Boshko Obradoviq, udhëheqës i krahut të djathtë Dveri, i cili gjithashtu ka shpallur kandidaturën e tij, ka thënë se vendimi i Vuçiqit për të kandiduar do të thotë se progresistët nuk kanë ndonjë figurë tjetër politike që mund të jetë kandidat dhe se Presidenti aktual Nikoliq ka qenë duke bërë punën e tij keq.

Bojan Klacar nga CESID tha se kandidatura e Vuçiqit nuk do të ndryshojë strategjinë e opozitës në drejtim të një kandidati të përbashkët, sepse në këtë pikë do të ishte e vështirë të pritet nga të gjitha partitë opozitare për ta mbështetur Jankoviqin ose Jeremiqin.

Vendimi i lidershipit të Partisë Progresive për të mbështetur Vuqiqin duhet të miratohet në mbledhjen e bordit drejtues të partisë më 17 shkurt.