Pamje nga seanca e gjykimit për vrasjen që ka ndodhur në Deçan më 2011 – Foto: KALLXO.com
I Akuzuari e Pranon Fajësinë për Vrasjen në Deçan
Shaip Zukaj ka pranuar fajësinë për vrasjen e Zymer Dervishajt dhe plagosjen e Adil Thaçit në vitin 2011 në Deçan.
Gjykata bëri të ditur se aktgjykimi rreth këtij rasti do të shpallet pas tre ditësh.
Pasi u lexua aktakuza nga prokurori Agim Kurmehaj, i akuzuari Shaip Zukaj ka pranuar fajësinë për dy veprat penale për të cilat akuzohej: vrasje e rëndë dhe armëmbajtje pa leje.
I akuzuari tha se ndjen keqardhje për rastin që kishte ndodhur në vitin 2011 në Deçan.
“Unë e ndjej veten fajtor, i kërkoj falje të sinqertë palëve të dëmtuara. Ndihem fajtor për veprimet e shkaktuara. Ia lë në vlerësim Gjykatës vendimin”, tha Shaip Zukaj gjatë seancës se shqyrtimit fillestar.
Prokurori i rastit, Agim Kurmehaj, para se i akuzuari të deklarohej rreth fajësisë, lexoi aktakuzën në bazë të së cilës, Shaip Zukaj nga fshati Beleg i Deçanit, në vitin 2011 me pushkë automatike ka vrarë Zymer Dervishajn dhe plagosur Adil Thaçin, në Tregun e Gjelbër të Deçanit.
Ai po ashtu akuzohej edhe për armëmbajtje pa leje.
Prokurori Kurmehaj tha se duhet pranuar pranimi i fajësisë nga i akuzuari, pasi që i njëjti në konsultim me mbrojtësit e tij ka qenë i vetëdijshëm për benifitet dhe pasojat e pranimit të fajësisë.
Edhe avokati Ndrec Dodaj, që mbron të akuzuarin, tha se ndjen keqardhje për rastin e ndodhur dhe kërkoi nga Gjykata të pranohet pranimi i fajësisë me arsyetimin se paraprakisht ishte konsultuar me klientin e tij.
Përveç prokurorit dhe avokatit edhe përfaqësuesit e familjarëve të dëmtuar para trupit gjykues thanë se ia kanë falur gjakun të akuzuarit dhe pranojnë pranimin e fajësisë nga ana e tij.
“Prej atij momenti qe ia kemi fal gjakun, për mua 1000 herë në ditë me pa (Shaip Zukën) është njëjtë. Për mua vlen pranimi i fajësisë dhe ia lë në vlerësim Gjykatës”, tha Besnik Dervishaj kur u pyet nga gjyqtarja e rastit rreth pranimit të fajësisë nga i akuzuari.
Njëjtë u përgjigj edhe i dëmtuari Adil Thaçi, i cili deklaroi se ia ka falur gjakun të akuzuarit.
“Ne si familje e kemi falur gjakun, ka qenë i sinqertë në pranimin e fajësisë. Nuk do të parashtrojmë kërkesë për kompensim”, deklaroi Thaçi.
Tutje gjykata mori aktvendim për pranimin e fajësisë nga i akuzuari Shaip Zukaj, ndërsa bëri të ditur se aktgjykimi rreth këtij rasti do merret ketë të enjte.
Shaip Zukaj kishte qëndruar në arrati për disa vite derisa u arrestua në shtetin e Belgjikës dhe më pas u ekstradua në Kosovë, për çka raportoi KALLXO.com.
http://kallxo.com/belgjika-ekstradon-shaip-zukajn-dyshuar-per-vrasje-ne-decan/
Po ashtu, KALLXO.com raportoi edhe kur Zukaj doli para Gjykatës Themelore të Pejës në seancën e procedurës paraprake.
http://kallxo.com/del-para-gjyqit-per-vrasje-ekstraduari-nga-belgjika/
KALLXO.com raportoi edhe kur Prokuroria Themelore e Pejës ngriti aktakuzë ndaj Shaip Zukajt për veprën penale “vrasje e rëndë” dhe “armëmbajtje pa leje”.