Aktakuza Ndaj Deputetëve Kthehet në Rivendosje

Aktakuza që rëndon mbi deputetët e Kuvendit të Kosovës, Haxhi Shala (Nisma për Kosovën) dhe Ismajl Kurteshi (Vetëvendosje), do të duhet edhe njëherë të kalojë testin e kalueshmërisë në Gjykatën Themelore pasi që Gjykata e Apelit e ka anuluar vendimin e gjykatës së instancës së parë.

Prokuroria Themelore e Prishtinës kishte ngritur aktakuzë ndaj deputetëve Shala dhe Kurteshit më 6 janar të vitit të kaluar nën akuzën e përdorimit të armës apo mjetit të rrezikshëm.

Avokatët mbrojtës të të akuzuarve kishin paraqitur kundërshtimet e tyre ndaj kësaj aktakuze mirëpo Gjykata Themelore me aktvendim i kishte hedhur poshtë, duke i cilësuar kundërshtimet si të pabazuara.

Të pakënaqur me vendimin e Gjykatës Themelore, që i refuzoi kundërshtimet ndaj aktakuzës, avokati i Haxhi Shalës, Naser Sopjani, iu drejtua Gjykatës së Apelit.

Gjykata e shkallës së dytë ka miratuar ankesën e tij, duke e rikthyer në rivendosje këtë aktakuzë.

“Aktvendimi i Gjykatës Themelore është përfshirë me shkelje esenciale të dispozitave të procedurës penale, ngase në bazë të pretendimeve të mbrojtësit, Gjykata e shkallës së parë ka refuzuar kërkesën për hedhje të aktakuzës dhe kundërshtimin e provave, mirëpo në arsyetim nuk ka dhënë arsyet konkrete të refuzimit por vetëm ka bërë parafrazimin e dispozitave ligjore”, thuhet në vendimin e Gjykatës së Apelit.

Me vendimin e saj, të cilin e ka siguruar KALLXO.com, Gjykata e Apelit e obligon Gjykatën Themelore që të evitojë shkeljet e evidentuara dhe të arsyetojë vendimin e saj për refuzimin e kundërshtimeve të aktakuzës.

Deputeti Haxhi Shala ishte arrestuar më 30 nëntor të vitit 2015 nën dyshimin për hedhje të gazit në Kuvendin e Kosovës.

http://kallxo.com/arrestohet-deputeti-haxhi-shala/

http://kallxo.com/haxhi-shala-mbetet-ne-arrest-shtepiak/

http://kallxo.com/haxhi-shales-i-caktohet-ndalimi-policor/